O le tele o mafatiaga ona o feuiuia’iga i le auaunaga a le Matagaluega o Galuega Tetele a le Malo e maua ai pemita faataga e fausia ai se fale, faapea le faatagana mai le ofisa o le PUMA o latou e maua ai le ki ma le tatala o le saogalemu o vaega uma a o le’i fausia se laoa ma se maota, ua iai le talitonuga o le a faaitiitia ia feuiuiaiga e tele, ina ua tapuvae tasi nei ia auaunaga a le Matagauega o Galuega Tetele i lona ofisa fou i le fogafale i luga o le maketi i Salelologa.
Na faaleo e le afioga i le Sea o le sinoti a Salafai i Sisifo o le ekalesia Metotisi, o ia na ta’ita’ia i le sauniga e tatala ai le ofisa, le susuga Falefia Tupu, le talosaga i le Minisita o Galuega tetele e silasila i ia mafatiaga.
Le Minisita o Galuega Tetele le tofa Olo Afoa Fiti Vaai i le tatalaina o le ofisa fou o lana matagaluega i le maketi i Salelologa i Savaii. O le faai’uga o lenei vaiaso a o iai le Minisita i Salafai, ua tatala ai nisi o galuega o auala tetele ua mae’a ona sua ma faavalitā, o le auala lea i Vaegā i le itumalo o Satupaitea ma Tapueleele i le itumalo o Faasaleleaga Numera 3.
