Na maua le avanoa e fesiligia ai le ofisa sili o le matagaluega o faamasinoga, le Susuga Papalii Tamailelagi John Afele, i sona finagalo i le aafia o faaiuga o faamasinoga a le atunuu sa se’ei ai afioga i faamasino ua faamuta aloaia a latou auaunaga.
Na saunoa Papalii, o loo tapena i le taimi nei le komisi o Faamasinoga o Fanua ma Suafa i le tulaga tonu lena, aemaise o le teuteuga o le tulafono o Fanua ma Suafa 2022, lea sa pasia ia Tesema, o loo iai le vaega o le tulafono e faasaoina ai faaiuga lea na se’ei ai tamalii ua malolo nei.
Ma o le a tapa foi e le komisi se finagalo o le Loia Sili, poo le ā tonu le tulaga e tatau ona iai, pe afai e manino mai e manaomia se isi teuteuga i le tulafono ae mo le taimi lava nei, o loo iai vaega o le tulafono toe teuteu o le faamasinoga o Fanua ma Suafa, lea sa pasia ia Tesema 2022, e mafai ona faasaoina ai faaiuga poo measina a aiga sa auai ai faamasino ua malolo nei.
Saunoa Papalii, o le toe faia o teuteuga o le tulafono, o inā tonu lea na faasaoina mai ai nisi o faamasino o le faamasinoga Fanua ma Suafa, sa tofia lalo o le tulafono 2020, ae o le tulaga lava ia, e aafia uma lava faamasino ae o le teuteuga ua laveai mai ai nisi o faamasino.
E lei leva nei na tusi atu ai le Ofisa Sili, lea sa avea ma failautusi o le komisi, e logoina le afioga Tuilagi Saipele Esera, Tuioti Sakaria Taituave, Iuli Iuga Sefo Fautua’alii, mo le faamuta aloaia la latou auaunaga, ona e le tusa ma le tulafono e pei ona sa totofi ai latou.
