Ua tali pea le Malo o Iapani i talosaga a nuu ma afioaga i le fia faafou ma fausia ni faleaoga aua le aoaoina o fanau lalovaoa o Samoa, ma ua le tasi ae ua atulasi le agalelei o lea Malo.
O le a’oga tulagalua a le afioaga o Faga i Savaii ua umusa i lenei vaiaso lo latou faleaoga fou e valu potu aoga, o le potu mo le aoaoina o le tomai tau masini computers, potu tusi ma le potu o faiaoga, faapea ma le nofoaga mo faleui ua fausia i se tulaga saogalemu ina ia maua e fanau le soifua maloloina lelei.
Sa auai le Minisita o aoga taaloga ma aganuu le afioga Seuula Ioane ma le sui o le Malo o Iapani i Samoa, faapea le sui faipule o le itumalo o Faasaleleaga Numera 4 o loo aofia ai ma le afioaga o Faga, le afioga Tea Peato.
E 513,000 tala Samoa le tau o le galuega ae le aofia ai le sao o matua o fanau o le a’oga tulagalua. O le Aso Tofi o lenei vaiaso na patipatia ai e matua ma fanau faapea le pule ma faiaoga le mae’a ai o le faleaoga fou.
