O le afioaga o Magiagi i le afio o le Matua ia Tofaeono, faapea le afifio o Asi ma Patu aemaise le alalatai o i laua na tai, na saunia le faaaloalo o le ava faatali i le afio atu o le tamaitai Kovana Aoao o Niu Sila, le afioga Dame Cindy Kiro, ma lana aumalaga, i le faamoemoe o le Kovana e afea le fanua maliu i Magiagi mo le tauaaoina o se pale fugalaau i tuugamau o fitafita Niu Sila o loo lagomau ai.
E toa sefulutasi fitafita o loo iai o latou tuugamau i lea fanua maliu i Samoa. O loo faaalia i faamaumauga o le toaiva o i latou na maliliu i le taimi o le faamai tele i le tausaga e 1918, ae toalua na maliliu i ni manua mai ni aafiaga tau ia laua lava.
O se tasi lea o polokalame faatulagaina o le malaga asiasi mai i le atunuu a le Kovana ma o le Aso Lulu na faatino ai lea faaaloalo, ina ua taliu mai le motu o Savaii, sa afea ai e Dame Cindy Kiro ma lana aumalaga le afioaga o Siutu mo le molimauina o le gaosiga o le siapo, faapea lana asiasiga i le Itu Asau.
O le toe taliu mai foi i Upolu o le faigamalaga na toe faalauiloa ai e le tamaitai Kovana taumafaiga mo le faasaoina o le Manumea o le manulele a Samoa. O le Aso Tofi ua faamoemoe e toe taliu ai i Aotearoa Niu Sila le Kovana ma lana aumalaga.
