O loo faatalanoa nei e le Pulega a Aukilani poo le Auckland Council ma le malo le toe faatulagaina o nisi auala i nofoaga saogalemu e pei ona saunoa iai le sui pulenuu o le aai tele.

E 6 piliona lea ua faamatuu ese e le malo mo le fā tausaga i le poloketi lea e amata i le toe faaleleia o le drainage system i le state highway 1 e lata i le faaitu o Epsom i Aukilani.

I suesuega sa faia na iloa ai o le isi vaega aupito lamatia i le sootaga lea o auala i Aukilani o le vaega na iai le sologaeleele i le State Highway 1 i le itu i Matu o Albany. 

Ua faailoa ai e le sui pulenuu o Aukilani, Desley Simpson e talia lelei lenei vaegatupe mo le poloketi lea ma o le a iai vaega o le auala i Aukilani o le a lē mafai lava ona toe faaleleia ona o loo iai i se nofoaga lē talafeagai.

Fai mai le leitio faavaomalo a Niu Sila, o loo galulue faatasi le Auckland Council ma le minisita o galuega, Michael Wood i se fuafuaga tuufaatasi e galueaina ai se tali mo ia faafitauli i auala.

Ua faailoa ai foi e le sui pulenuu o le a silasila foi le pulega pe alagatatau ona toe faatulaga nisi auala autu, main roads mo le saogalemu.