A o loma ai le fonotaga tele a Malo Aufaatasi i mataupu i le suiga o le tau poo le COP28 i Dubai i le masina o Novema o le tausaga nei, o loo faagasolo talatalanoaga a le Pasefika i Samoa i vaega o loo maitau ua faaleagaina ma aafia ai atunuu o le Pasefika i le fesuisuia’i o le tau. 

E mai pepa o faamatalaga, e tusa ai ma lipoti mai vaega o suesuega o le tau i le lalolagi poo le Intergovernmental Panel on Climate Change (I.P.C.C) o loo faamaonia ai le telē o le aafiaga o loo feagai nei ma atunuu o le Pasefika ona o faafitauli o loo alia’e mai i suiga o le tau.

O nei aafiaga e aofia ai le siisii pea o le suasami, o le faaleagaina lea o le soifua o meaola, afā ma lologa ma isi.

O lenei faatalanoaga e pei ona faaalia e le Faatonu a le Ofisa o Polokalame tau i le Siosiomaga a le Pasefika (S.P.R.E.P) Sefanaia Nawadra mataupu o loo iai le naunautaiga e ao ina faatalanoaina.

“O nisi o vaega o le lalolagi o loo ua iai aafiaga o le suiga o le tau o loo tatou faalogoina pea i nisi o taimi, e pei o galuafi ma le faatama’ia o vaomatua i le afi i Europa ma le itu Matu o Amerika a o lologa o loo aafia ai le atu Asia.” 

“O lologa na aafia ai Pakistan o se vaega lea o le faaleagaina ma aafiaga na talia i le fontoaga a le COP27 ma e iai le naunautaiga o nei vaega ua folasia i lea fonotaga e fesoasoani ai i le Pasefika ia agai luma le talanoaina o vaega o loo aafia ai o tatou tagata.”

Talu mai le fonotaga a le COP27 na faatino ai aoaoga ma fonotaga na taimua ai le vaega ale S.P.R.E.P ma nisi o ana paaga e patino lea i le autu o faatalanoaga oloo faia ile taimi nei ma o nei vaega uma e faufau ai manatu ma mataupu e tuuina atu ile fonotaga tele COP28 ile masina o Novema 

“O lenei faamoemoe o se avanoa e oo ai i le loloto talanoaga i sui auai mai le Pasefika e galulue faatasi ma fefaasoaa’i manatu auā o le ogatotonu o nei mea uma e faasino lea i le soifuaga o tagata uma o le Pasefika ia ola saogalemu mai le tele o suiga o le tau ua aafia ai.

“Aua ne’i o tatou tuuvaleina a tatou galuega, ia o tatou saili malosi ia o tatou tutū faatasi mo le saogalemu o tatou tagata Pasefika ae a lē faasaoina o le lalolagi mai aafiaga ogaoga o suiga ole tau.”

O lenei faamoemoe e faamae’aina i le aso a taeao ma o loo auai ai uma sui mai Malo a le Pasefika faapea faalapotopotoga tuma’oti ma i latou o loo iai le tomai i mataupu o suiga o le tau.