Ua amata fonotaga a tausi soifua, faatosaga ma le matagaluega a le soifua maloloina i le vaiaso nei e talanoa ai le isi laaga o faaiuga mo totogi.
Mai le New Zealand Nurses Organisation o lea o loo faatalosaga o latou sui i se ofo o totogi e tutusa ma le inflation faapea ai ma le lē faamalieina o tuutuuga o loo galulue ai nei.
O le toatele foi o tausi soifua o tina e fai fanau, ma e le fetaui totogi o loo maua ma le taugata o le soifuaga ua iai aemaise o le tausiga o aiga.
O fonotaga na amata i le aso ananafi e faapea o loo auai ai le oo atu i le 35,000 o le aufaigaluega mai soo se vaega o le atunuu.
E 57 le aofai o fono nei ma i tala a le leitio a Niu Sila, o le toatele o le aufaigaluega o loo faaalia le lē saogalemu ona o le pisi tele i le tumutumu atu o tagata i falemai ae toagaogao le augalulue.
