Ua aumai i Samoa le fono a Minisita o Faatoaga o le Pasefika e faasoa ai manatu ma lagona o atunuu o lenei faaitulagi i ni auala e faateleina ai pea taumafa mai lafumanu ma mea fafaga faapea laau tau faatoaga, i le faanaunautaiga o malo o le Pasefika, e galulue faatasi atunuu e saili auala ma metotia e ausia ai le tulaga gafataulimaina o le maua pea i totonu o atunuu o taumafa e faaitiitia ai le faalagolago i taumafa mai isi atunuu.
Na faaalia e le Minisita o Faatoaga ma Faigafaiva, le susuga i le Laaulialemalietoa Leuatea Polataivao Fosi Schmidt, o le taimi nei e i le va o le 70 i le 80 pusaoloa tetele 40 futu poo container o loo aumai ai le aano o moa mai Amerika mo Samoa.
Saunoa le minisita, e lē o se tulaga lelei le ola faalagolago pea o atunuu i taumafa mai fafo ma o le autu atoa lea o le fonotaga na saunoa ai le taitai o le malo le afioga i le tamaitai Palemia e tatala aloaia.
Le afioga i le Minisita o Faatoaga ma Faigafaiva, susuga Laauli L Polataivao Fosi Schmidt. O le afiafi o le Aso Lulu na tapunia ai le fonotaga sa taulamua i le tapenaina le faalapotopotoga o Faatoaga Ma Taumafa a Malo Aufaatasi le FAO.
