E lei faigofie le po anapo i North Island.
O se po pisi na iai le po anapo e le gata i aiga aafia na aveesea faamalosi mai o latou fale, ae faapea le aufaigaluega.
A o agai atu ai i Saute le afā o Gabrielle e oo mai i le taeao nei ua faaopoopo aai o le North Island ua valaau a latou poloaiga o faalavelave faafuasei poo state of emergency.
O Hawkes Bay o se tasi lea o vaega ua tigaina i le taeao nei i lologa faapea le tele o sologa eleele.
I Aukilani e oo mai i le ‘afa o le fitu e sau ai le isi lipoti a le Auckland Emergency Management faapea le ofisa o le tineimu, e lei maua lava le isi toatasi o le ofisa o tineimu na o faatasi ma le fale na solo anapo i Muriwai latalata i le itula e 11.
Mai le pule sili o le ofisa o tineimu i le taeao nei, Kerry Gregory o lea sa tali atu le aufaigaluega i lologa i Muriwai, ma na faafuaseia ona solo le eleele ma tafiesea atu ai ma le fale a o iai le toalua o le aufaigaluega i totonu.
O le isi toatasi na mafai ona laveaiina e ui o loo iai i se tulaga tigaina tele, peitai o le isi o loo tau sailia pea.
Ona o le lē saogalemu na iai lea nofoaga anapo e lei faigofie ai galuega laveai ma e oo mai i le taimi o tala fou o loo tālia pea se faaiuga i le taimi e toe amatalia ai sailiga.
O le sui o le aufaigaluega o loo sailia nei, e faapea o se tasi o volunteers.
I Aukilani lava, o le ono pa’ū o le pou poo le tower 109 ona tausaga i Mt Eden anapo na aveese faatopetope mai ai ma le toatele o aiga o loo nonofo latalata i lea pou.
E tusa ma le 50 apartments i Mt Eden na aafia ai.
Pe a tuu mai i feoaiga i luga o le sami i Aukilani, o le po foi anapo na sau ai le faaiuga a le pulega, ua taofia uma malaga a vaa feoai i le sami na fuafua mo le asō ma o loo maua le atoaga o lea suiga i luga o le upega tafailagi a le Auckland Transport.
I le itu tau eletise, e faitau sefulu afe fale o aiga ua leai nei se eletise ma o le lapataiga ua sau e iai nisi o aiga nei e oo atu i le vaiaso o motusia pea.
A o lē faigofie ai i le aufaigaluega o loo gafa ma galuega laveai, ae ua toe sau le talosaga i tagata e fesoasoani mai i le galuega fita o loo faia e ala i le nonofo i le fale ae le o le o i matafaga e pei ona molimauina i nisi o tagata ananafi.
E ese mai i lea o le tuuitiitia o tagata feoai i luga o auala ona e le o saogalemu e mafua i le tele o laau ma poumoli ua touulu.
