O le Aso Lua le aso 6 o Setema o lenei tausaga 2022, ua avea nei ma se tasi o aso taua i talafaasolopito o le faailogaina o aso fiafia e sami ai le Sisigafu’a o le Malo Tutoatasi o Samoa, ona o le uluai taeao o lea sauniga taua ua masii ai le Malo e faamanatu i Puleono i Salafai, e pei ona sa faatino lea sauniga mamalu i le afioaga o Salelologa i le nofoaga o loo iai le Kolisi o le DonBosco a le Ekalesia Katoliko i Samoa.
O se tasi o taeao faitauina o le atunuu aua o vaaiga o lea sauniga e pei lava o sauniga e masani ona molimauina i le malae o Tiafau o le malae o le faautugatagi o Samoa i Mulinuu.
O se faamanatuga muamua foi o le tutoatasi ua faia i Salafai ae ua atoa le 60 tausaga le Iupeli taimane talu ona pulea e Samoa ona lava upufai i le tuanai o tausaga sa pulea faakolone ai e isi Malo.
O le Kovana Aoao o Niu Sila ma lona alii o malo faaaloalogia ia i le sauniga aua ua atoa foi le onosefulu tausaga o le feagaiga faauo ma lea Malo.
O le susuga i le toeaina o le faafeagaiga foi o le Ekalesia Faapotopotoga Kerisiano Samoa i Samalaeulu sa tapenaina le upu faaleagaga.
Se vaega o le sauniga lotu na saunia e le susuga i le Toeaina o le faafeagaiga o le EFKS i Samalaeulu susuga Palemia Tauiliili.
O le afioga i le taitai o le Malo na saunoa e toe faailo le taua i polokalame o le onosefulu tausaga o le tutoatasi, o le auai o tagata uma i le patipatia ma le samiina o lona malo tutoatasi.
Le afioga i le tamaitai Palemia afioga Fiame Naomi Mataafa. O le faamauina i tala faasolopito o sauniga o le tutoatasi ua faamanatu ma sisi ai le fu’a o le saolotoga i Savaii mo le taimi muamua, ua faamauina ai foi ma le uluai fono a le Palemia ma Minisita o le kapeneta ua tauaofia i Puleono mo le uluai taimi talu ona tutoatasi Samoa i le tausaga e 1962.
