Sa tapuaia e aiga le malaga atu mo galuega faavaitaimi auā sailiga manuia mo le atinae o aiga i Samoa, peitai ua ufitia le faanonogamanū i le ao pogisa o le faanoanoa ina ua logoina le fano o soifua o ni alii se toafā mai lo tatou atunuu, sa galulue faavaitaimi i le setete o Vitoria i Ausetalia.

O lipoti i le po o le Aso Sa na tea nei a le TV9 a lea atunuu na faailoa ai lea faalavelave tau taavale ua aafia ai soifua oi latou, lea e faapea o loo faia suesuega a leoleo pe na mafua i sea ona tupu le faalavelave.

O loo masalomia e leoleo e pei ona faaalia i lea lipoti poo se manu o le kagalu poo se deer na kolosi ma sopoia le auala na mafua ai ona tifa i tua le taavale o se van na malaga ai i latou ua maliliu, ma aafia i se mu.

E lē o iloa foi pe sa saoasaoa le taavale fua ina oso i tua ina ua oo i se vaega o le auala e iai se pi’oga. 

Ua faailoa mai e se tamaitai o lona tuagane 25 tausaga ua maliu ai i le faalavelave, o le taeao o le Aso Gafua poo le itula e sefulu na logoina ai lo latou aiga i le tala faanoanoa o lona tuagane ua maliu o le uii o le fanau e toaono.

O le alii talavou ua maliu, le tuagane ole tamaitai na fesootai iai ua 25 tausaga o lona soifua mai le nuu o Letogo.

O le tasi o alii talavou 27 tausaga mai Falefa ua fano ai foi lona soifua i le faalavelave.

O le tasi o tama tane ua 28 tausaga le matua mai Lufilufi ma le isi ua 34 tausaga lona matua mai afioaga o Lefagaolaii ma Safotu i Savaii.

O ia lea e toatasi si o la alo ma lona toalua o loo i Samoa.

Ua faailoa e le taitai o le aufaigaluega faavaitaimi sa galulue faatasi ma i latou ua maliliu, o le Aso Sa na o ai i latou ia e toafā e tafafao ma asi nisi o tagata faigaluega faavaitaimi i le vaega lava lea o Ausetalia e lē mamao pe ā ma le 40 minute e alu ai le taavale.

O le toe foi atu i lo latou nofoaga o loo faamautu ai na tupu ai ma le faalavelave.

Sa faaalia e le taitai ua lē manao e faailoa lona suafa, e toaono i latou sa tuua Samoa ia Iulai o le tausaga nei mo galuega i se faatoaga mo le umi e iva masina.

Ua totoe nei na o ia ma le tasi o le latou vaega lea e faatoa mae’a lo latou taimi galulue ia Aperila o le tausaga fou.

Na faaalia e le taitai poo le team leader, o loo faaauau pea suesuega a leoleo i le mafuaaga na tupu ai le faalavelave tau taavale.