O le afioga i le Palemia o le a taitaia le aumalaga a le Malo o Samoa e aofia ai ni Minisita o le Kapeneta ma ni Ofisa Sili o nisi o Matagaluega a le Malo, i le fono a taitai o atunuu o le Pasefika le Pacific Islands Forum Special Leaders Retreat, o le a usuia i Nadi i Fiti mo aso e lua, le Aso Tofi ma le Aso Faraile o le vaiaso fou.
O se fonotaga ua tatala ai le avanoa i taitai o Malo o le Pasefika ma latou usugafono e tuuina atu ni mataupu e manatu e ao ona faatalatalanoa i lea faatasiga tāua, a o loma ai le fono masani a taitai o le a talimalo ai le atunuu o le Atu Kuki i le tausaga nei.
O se fonotaga foi o le a faatino ai tulaga masani faavaomalo i le tuuina atu aloaia o le taitaifono i le Palemia o le Atu Kuki a o lumanai lana taligamalo i le isi fono a taitai ua fuafua e usuia i se masina o le kuata mulimuli o lenei tausaga 2023.
