O le avea ai o le Minisita o Puna’oa faalenatura ma siosiomaga le afioga Toeolesulusulu Cedric Schuster ma ta’ita’ifono o atunuu laiti tau atia’e i le fono a Malo Aufaatasi le COP-29 o loo talanoaina mataupu i suiga tetele o le tau, ua lipotia ai o Samoa na ta’ita’ia le teva a atunuu laiti tau atia’e i taualumaga o lea fono a le lalolagi, ina ua faatalanoa aiaiga o tupe e totogi atu e atunuu tetele ma malolosi tamaoaiga i atunuu laiti tau atia’e e mafua ona o aafiaga o atunuu laiti i suiga o le tau.

O le Minisita o Puna’oa Faalenatura ma Sisoiomaga na talanoa atu i tusitala ma ia faailoa ai le mafuaaga o le latou teva lea na savavali ese ai atunuu laiti  tau atia’e i le Aso Gafua o le vaiaso nei a o talanoaina ma atunuu malolosi tamaoaiga tuutuuga na malilie iai i le fono na usuia i Pale i Farani e faasino i le aofa’iga o tupe e maua, peitai ua lē savavali atunuu malolosi tamaoaiga i ia tuutuuga.

E tasi le tiliona tupe Amerika sa finauina e tatau ona faasafua i atunuu laiti ona o aafiaga mai suiga o le tau, peitai ua na o le 300 piliona tala tupe Amerika ua ioeina e atunuu tetele e malolosi tamaoaiga.

O lea tupe tele o le a faamatuu atu i atunuu laiti tau atia’e mo galuega o le toe faaleleia o o latou tamaoaiga mai suiga o le tau e ala i ni nonoga tupe ae e lē o ni foai poo grants, e pei ona sa finauina e atunuu laiti e lē malolosi o latou tamaoaiga lea e aofia ai ma Samoa.