Ole naunautaiga i se itumalo manuia ile lumamai ole auga foi lea o le faatalatalanoaga na faatino ele itumalo o Palauli No.1.

I faamatalaga mai le Ofisa o le Sooupu a le Malo, o lenei faatalatalanoaga sa patino lea i Susuga i Faafeagaiga ma faletua a Ekalesia uma i totonu o le itumalo na taimua le Tofi o le itumalo Afioga Mulipola Anarosa Ale Molioo. 

O lenei faamoemoe o le faaalia ai o finagalo e ala i nisi o mataupu e pei o sauaga i le lotoifale, soligatulafono e aafia ai tupulaga i le tagofia o fualaau faasāina, ave faamalosi o tagata ma fesoasoani mo i latou o iai aafiaga tumau o le soifua. 

Na ave foi se manatu ia i latou na auai ina ia aua ne’i na o faafitauli e folasia ae ia mafai ona faasoa ai ma ni auala e foia ai. 

O auala e fofo ai nei mataupu o le a faaaogā lea e le Ofisa o le fono faavae a le itumalo e faataatia ai ana fuafuaga.

Na faaalia e Mulipola o se vaaiga e faagaeetia ona o lenei avanoa ua mafai ai ona faasoa lona itumalo i mataupu e ao ina talanoaina. 

“O le taimi muamua lenei o lenei talanoaga ua tatala ai faitotoa ma i latou e eseese tapuaiga i totonu o le itumalo ma fonofono faatasi i se nofoaga e tasi e talanoa ma faasoa faafitauli o loo tutupu i aiga ma afioaga.

“Ae o le mea pito sili ona tāua o le galulue faatasi e saili fofo o nei faafitauli i totonu lava o le itumalo ma mafai ai ona silasila i itu e faatino ai o le itu tau seleni ma isi.”

Na ia ta’ua ai foi le tāua o faafeagaiga ma faletua i totonu o afioaga aemaise lo latou sao i mataupu faapenei.