O Vaiee o se tasi lenei o afioaga na asia e le Faatonu o le Ofisa a Malo Aufaatasi i Samoa nei ia Kanni Wignaraja i le aave ai o tala i le Pasefika i ana taumafaiga e tafiesea lenei faafitauli mai ona laufanua.
O le afifio ai o lenei aumalaga mai le Ofisa a Malo Aufaatasi ma le Faatonu ina ia faasoa mai e sui o le afioaga le tulaga o loo iai lenei faamoemoe i totonu o le afioaga.
Saunoa le sui o le afioaga ia Tuia Logoiai Pua Letoa e tusa ai o le faatinoga a le afioaga mo le tafiesea ai o lenei faafitauli.
“O le tausaga 2009 na mautu ai i finagalo o Alii ma Faipule o le afioaga o Vaiee e faatino se faasalaga i soo se sauaga e aafia ai tina ma fanau ma o Vaiee o le uluai nuu lea ua faatinoina lea tulaga.
“E le o se tulaga faatoa tupu anapo poo ananafi e le o se tofa foi na talia gofie e le afioaga ae peitai o le naunautaiga ia saogalemu ma filemu tagata o le nuu.
“E iai lo matou talitonuga a foia lenei faafitauli mai totonu o le lotoifale o le a maua se toafilemu o le nuu i aso uma.”
O le malamalamaga o le afioaga i tu ma agaifanua ma le tulafono i ona alafua sa fai lea ma se tasi o vaega e taialaina ai lenei fuafuaga i le afioaga.
“O sauaga i tina ma fanau o se faamai tele lea i le atunuu ma o loo molimau ai i le alualu i luga o le fuainumera o mataupu e aafia mai i sauaga faalotoifale.
“E faigata tele ona suia o tatou mafaufau i se mea aemaise a tatou amio ae ao ona faatino se gaioiga ina ia laveaiina ai soifua.
“E le atoatoa le tagata e iai taimi e pa’ū atu ai i le tele o faafitauli ae peitai ina ua amata faatino lenei faasalaga mamafa pe a aliae mai sauaga i tina ma fanau o loo avatu ai se feau i le nuu e le taliaina i totonu o le nuu lenei soo se ituaiga sauaga e faatino i tina ma fanau.”
O nisi o polokalame e faatino e fesoasoani ai i le afioaga i la latou feau molimoli e aofia ai polokalame ma seleni fesoasoani mai le ofisa o Malo Aufaatasi i Samoa nei ma nisi o ofisa o loo latou galulue faatasi ina ia faaauau pea le tetee atu ma taofia sauaga i tina ma fanau i totonu o le afioaga.
