O toleniga a o lumana’i ai se taamilosaga e masani lava ona avea o se lu’itau tele mo soo se taaloga aemaise lava i le vaitau lenei o le Kerisimasi ma aso mālōlō.

E faapea foi le lagona mo le ‘au a le Moana Pasifika lea sa faia mai pea a latou toleniga i le lua masina talu ai e sauni ai mo le taamilosaga o le tausaga fou 2025 i le Super Rugby Pacific.

E talitonu le faia’oga ulu o le ‘au, Faalogo Tana Umaga e oo atu i le taimi lea ua lava sauni lana ‘au ma ua sili atu le tulaga ua iai le ‘au i le taimi nei e faatusa i le taimi faapea i le tausaga talu ai.

Na faailoa e Umaga o nisi e aupito lelei i le taaloga o loo fesoasoani ia te ia e pei o le faia’oga sa iai o le Manu Samoa Vaovasamanaia Seilala Mapusua ma le alii o Alando Soakai sa faia’oga i le ‘au siamupini i le NPC faapea le alii o Stephen Jones sa taalo mo Wales.

O le tausaga nei e 4 mālō na iai a le ‘au ma o le taimi muamua foi lea ua ausia ai ia mālō e fā.

O le aso 15 o Ianuari le taaloga a le Moana ma le Otago Highlanders i le latou malaetaalo fou ua iai nei, ona faimalaga ai lea e taaalo ma le Western Force i le aso 15 o Fepuari i le taamilosaga muamua o le Super Rugby Pacific 2025.

Puna o Faamatalaga: https://www.rnz.co.nz/international/pacific-news/537266/umaga-hails-savea-s-touch-as-moana-pasifika-ramp-up-training-intensity