Ua nofo sala i le falepuipui se alii 36 tausaga le matua ona o le maliu o lona uso laititi 27 tausaga le matua.
O Fepuari o le tausaga nei i le nuu o Safa’i i Savaii na tulai mai ai se vevesi i le va o Maeli Faleiva ma lona uso ua fano le soifua ina ua ia umia se aupega matautia o se amo poumuli na ta faatolu ai le pito i tua o le ulu o le ua maliu.
I faamaumauga a leoleo i le solitulafono na tupu, ua faailoa ai sa tau fai faasuavā uma le auso tama ina ua fai se la inuga ina ua uma ona moa le latou vao.
O le inuga lea na vevesi ai Faleiva ma lona uso laititi ma umia ai e lē ua maliu se agaese ma ia faaoo ai ni manu’a i le ua faasalaina.
O se vevesi na aafia ai Faleiva i ni manu’a mai le agaese, ae na faifai tetele ina ua taumafai loa lē ua molia e faafilemu lona uso laititi na fealuai i le auala ma le agaese ma laulauvavale ai.
O le faafilemu lea na tagofia ai e lē ua molia se amo poumuli ma ia mulimuli atu i tua o lona uso ma ta faatolu le pito i tua o le ulu ma maliu ai lona uso laititi.
E 2 tausaga ma masina e fitu ona falepuipui ai lē ua molia na ia ioeina moliaga e tolu a leoleo e aofia ai le fasioti tagata pa’ivalea, faaoomanu’a tuga ma le umia o se aupega matautia.
