O faafitauli tau tupe maua i auaunaga a pisinisi e fesootai a latou tautua i le atina’e o tagata tafafao i Samoa, o le mau a le sui o le pulega a le pisinisi o le Moana Rentals le afioga Magele Daniel Ah Kau, o a lava luitau ma faafitauli e lototele e soosoo le tautua a le latou auaunaga tau pisinisi, ona o le lagolago a le atunuu aemaise o le itu tāua, o le fesoasoani a le Alii ma le fautua tatalo a le Tina Paia o Maria le Fetu o le Moana o loo sulufaga iai le Moana Rentals.

O lea ua tatala nei le nofoaga faaopoopo o lea auaunaga i le malaevaalele faavaomalo o le atunuu i Faleolo, ma o le afioga Patele Manuele Solofa o loo galue i Roma na ia faatautaia le sauniga na faapaia ai le nofoaga fou.

O ia o se uo mamae a faatonu o le kamupani le afioga Muliagatele Faimalotoa Allan Stowers ma le faletua o Nonah Stowers.

O pisinisi faapea sa aafia tele a latou tupe maua a o tapunia tuaoi o Samoa i le faamai, peitai o lea ua savalia nei le fa masina talu ona aveese uma noataga o puipuiga o le faamai koviti ma toe tatala tuaoi i malaga masani, ma ua fetaui ai le iai o le nofoaga i le malaevaalele faavaomalo o Samoa ma le fegasoloai o tagata malaga e le gata i tulisi ae o lo tatou atunuu e tafafao mai, poo ni malaga i feau tāua ma faalavelave faaleaiga.

Faaalia e le afioga Magele Daniel Ah Kau, o se aafiaga tele tau tupe sa feagai ma le pisinisi i le taimi o puipuiga o le faamai, ae e ui i ia faafitauli ua amata fausia foi se isi nofoaga i Alafua e faalautele iai le auaunaga a le kamupani.

O le tele o pisinisi faapea poo car rentals i lo tatou atunuu sa matua feagai ma mafatiaga tau tupe a o iai le lalolagi i puipuiga o le faama’i koviti, o lea ua toe amata ona toe maua ni seleni ina ua malaga mai o tatou tagata mai fafo.