E ta’i lua tausaga ma faagasolo le tauvaga pese tele a le World Choir Games i le lalolagi.
O le lua tausaga talu ai na talimalo ai le atunuu o Korea, ae o le tauvaga lenei ua uluai talimalo ai Niu Sila nei, ma o lenei tauvaga sa faia i le Spark Arena i le city o Aukilani.
E sefulutasi afe tagata pepese sa auai, mai le 250 aufaipese mai atunuu eseese e 40 o le lalolagi.
O lenei tauvaga o se tauvaga maoa’e lea i le lalolagi ona e auai mai ai atunuu tetele mai Europa, Amerika, ma isi atunuu iloga mai itu eseese o le kelope faatasi ai ma atunuu o le Pasifika.
E na o le lua atunuu o le Pasefika sa auai o le aufaipese mai Fiti ma le aufaipese lenei a le United Auckland Gospel Choir o loo alu atu i lalo o le faamalu o Niu Sila.
O Fiti sa manumalo i le auro i le pese faaleaganuu, ae o le aufaipese a le United Auckland Gospel Choir na siamupini i le auro i pese faaleagaga.
O le vaega lea o le tauvaga sa masani ona sili ai aufaipese mai Amerika peitai ane ua suia le faafofoga a i latou o loo faafoeina lenei tauvaga tele i lea po, i le fesuisuia’i o tapenaga o pese a le susuga ia Seumanu Seuoti Simon Matāfai ma le susuga i le faafeagaiga ia Rev Ieremia Amani Amituanai mai le Mission Choir, Sinoti Samoa Methodist Church of NZ, lea ua mafua ai ona suipi le aufaipese mai Niu Sila.
O le atunuu mai Saina na sili aoao i le tele o a latou auro ona e tele vaega o le tauvaga sa auai ai sui o latou aufaipese.
O le Auckland Gospel Choir na amata faavaeina mai i le Ipu o le Lalolagi i le tausaga 2011, ona faaauau mai lava lea o le aufaipese lenei mo Aukilani.
Ua faapipii iai le United Auckland Gospel Choir ona o lea ua galulue faatasi ma le Mission Choir Sinoti Samoa Methodist Niu Sila.
Ua faaalia le lagona fiafia ma le agaga faafetai o le susuga ia Seumanu Seuoti Simon Matāfai i lenei faamoemoe ona o le tulaga mati’e sa iai le taumafaiga a le la aufaipese ma le susuga i le faafeagaiga ia Rev Ieremia Amani.
E faafetai ai foi i le taumafaiga a le atunuu o Fiti ona e na o le lua aufaipese a atunuu o le Pasefika sa auai ae o lea sa mau tulaga uma i lenei tauvaga tele.
E viia ai le Atua i le faaaogāina o le tagata.
