Ua agai le malo e tauala mai lana matagaluega, Ministry of Social Development e siitia le maualuga o iloiloga faasaga ia i latou o loo sulu atu mo emergency housing.
Saunoa le minisita o fale Chris Bishop, o le sitepu muamua lea o le taumafai e tuuitiitia le toatele o loo faamoemoe i emergency housing, poo avanoa nei e saili e le malo agai i faletalimalo ma isi pulega ua mae’a faakonekarate e o iai tagata ua moomia vave ni fale.
Faamanino e le minisita ananafi o le a faia e le malo le Priority One mo aiga e iai fanau ae o loo nonofo i emergency housing, ma o i latou foi nei o loo manao le malo e fesoasoani iai ia vave ona maua fale i lalo o le social housing.
O emergency housing o se tasi lea o faiga faavae e lē o manuia i totonu o Niu Sila e tusa ma saunoaga a Bishop, ma o le $340 miliona i le tausaga o loo faaalu i fale nei e lē lelei.
O le Priority One ua faailoa mai o le a amata aloaia mai le masina fou.
E ese mai la i le taumafai e saili fale mautu mo aiga e iai fanau, o lea foi o le a siitia le maualuga o iloiloga e fesiligia ai le agavaa o tagata i taimi o talosaga.
Ua sau ai foi ma le teuteuga e ioeina mo le 1 agai i le 4 aso, ae lē o le 7 aso i le 21 aso lea o loo iai nei.
Mai le taimi nei faasolo atu i le masina o Aokuso o le a toe iloilo uma e le malo aiaiga nei e aofia ai ma le faatapulaa o ioega mai ia i latou o loo iloiloina talosaga.
