O le a suia mai lanu o ofuvae taaalo a le aulakapi a tamaitai a Aialani mai le lanu pa’epa’e sa sau a’i agai i le lanu moana (navy blue) ona o popolega a le toatele i le olaga faaletamaitai e ala i palapala masina (tulou). 

O lenei suiga e mo le saogalemu o tamaitai taaalo mai le faalumaluma ai o tagata pe a pisia ofuvae taaalo i o latou palapala masina ae le gata i lea e mo le soifua maloloina foi o le autaaalo. 

O ofuvae taalo fou o le a mua’i laeiina i le taaloga a le ‘au a Aialani ma le ‘au a Wales i taaloga o le Six Nations a tamaitai i le aso 25 o Mati o le tausaga nei. 

Faailoa e nisi o le ‘au a tamaitai a Aialani e ui o se vaega laititi lea mo le toatele ae mo i latou, o le sitepu aupito sili ona telē mo le latou aulakapi.