Ua lē taunuu le tele o koneseti ma faafiafiaga na tapena mo lenei long weekend.
O le koneseti tele lava a Aukilani o po e lua a Sir Elton John lea na faamoemoe e pese i le po o le Aso Faraile ma le Aso Toonai.
Molimau a tala fou na iai i le malae a Mt Smart i le po o le Aso Faraile, e lei avea le louloua o le tau na iai i lea afiafi e taofia ai le toatele, ma pe ā ma le toe tasi le itula amata, ae faatoa sau le faasalalauga ua le oo.
O le toatele o tagata na iai i lea po o tagata matutua e fiafia i musika a le alii pese, ma o le toatele foi e omai mai fafo atu o Aukilani ma o nisi o lea na omai lava e faaaoga tickets ona e le taugofie.
Na mautinoa loa i le Aso Toonai ua le taunuu foi le koneseti o le po o le Aso Toonai, na toe tuua ai loa e le vaalele a Sir Elton John le malaevaalele faavaomalo i Aukilani mo Hawaii i le aso lava lea.
Ae mo tagata na faatau tickets mo lea koneseti o lea ua sau tala e toe maua uma refunds.
O le isi festival na tapena mo le asō, St Jerome’s Laneway o lea foi ua le taunuu.
O le One Love Festival o lea foi na faaleaoga ai lava i le taeao o le Aso Toonai ona o le lē saogalemu e mafua mai i aafiaga mai timuga mamafa.
O lea na oo lava le Gardens Music Festival anapo i Aukilani, peitai na suia agai i le Spark Arena.
E le na o fiafiaga ua lē faataunuuina ae e iai foi kirikiti na fuafua mo le asō, peitai ua le faataunuuina foi.
Mo tagata Aukilani ma lana aso malolo o le Auckland Anniversary, ua suia nei o se aso toe faamamā mo le toatele ua aafia.
