Ua aloa’ia le avea o lē sa avea muamua ma minisita o le puipuiga a Ausetalia, Peter Dutton, e avea ma ta’ita’i o le vaega faaupufai a le Liberal ae filifilia le tamaitai o Susan Ley i le tofiga o le sui ta’ita’i.
O lona uiga ua sui tulaga ai i lē sa tulai mai i le tofi palemia, Scott Morrison. O Dutton le uluai tagata mai Kuiniselani ua filifilia i le tofiga lea o le ta’ita’i o le Liberal ma talu mai le 2001 na ia umia ai le tofi o le faaitu o Dickson I Brisbane.
Sa avea foi o ia ma minisita o isi auaunaga e pei o le home affairs, immigration ma le soifua maloloina. O lē ua tulai mai i le tofi sui ta’ita’i o le sui o le faaitu o Farrer i Niu Sa Uelese ma sa avea foi ma minisita talu ai i auaunaga tau le soifua maloloina ma le tausiga o tagata matutua.
Ua faaleo le faafetai a Morrison ia i laua ua tulai mai nei i tofi ta’ita’i o le pati ma le faamatalaga o ni tagata ua lava le silafia i vaega o loo galulue ai ma e lē taumate o le a tulagaese lo la tulai mai i ia tofiga.
