E 6 miliona tala se vaegatupe ua faamatuu e le Faletupe o Atinae o Asia e faatupe ai se sailiiliga i le fuafuaga e fausia se auala tele fou e tau atu i le taulaga i Apia, ina ia faaitiitia ai le tulaga uumi o laina o taavale i taimi pisi o le taeao i le amatalia o aoga ma galuega faapea le mānava o galuega.
Sa iai le fuafuaga e fausia lea auala tele mai Vaitoloa ma agai atu ai i Fugalei ma taunuu ai i le taulaga o Apia.
Peitai ua faailoa e le Minisita o galuega tetele ma fela’ua’iga ua lē taunuu lea fuafuaga ona o faafitauli tau eleele poo fanua, ae ua suia atu nei le fausia o le auala tele fou i Vailoa Faleata ma agai ai i le taulaga.
O se tasi lea o galuega ua faailoa e le Minisita le tofa Olo Afoa Fiti Vaai i le TV2 ma le polokalame o le Soalepule, o loo silasila nei iai le Malo mo le faatinoina, i le fuafuaga e faaitiitia le poloka o feoaiga a taavale ma le tuai i taimi o le taeao ma le afiafi e usu ai i galuega ma aoga aemaise i le mae’a o galuega i le afiafi.
O loo iai le fuafuaga a le Faletupe o Atinae o Asia latou te faatupe lea galuega, e pei ona faailoa e le Minisita.
