E 14 molimau a leoleo o loo suesueina nei e le Faamasinoga Maualuga ona o moliaga o ni alii e toalua faapea ni tamaitai e toalua, o loo tuua’ia e leoleo i lo latou umia o le pauta faasāina o le aisa, ma laau faasāina o le maruana.
O ia nakoti poo fualaau faasāina na maua i le osofaiga a leoleo na faatino i le fale o se aiga i Toamua uta i le masina o Me o le tausaga na tea nei.
O le aiga lea na tu ai le tootoo o alii ma faipule o le afioaga o Toamua ma faatulai ese, e mafua i manumanuga o matai i le ono aafia o tupulaga o le nuu i ni gaioiga solitulafono tau i fualaau faasāina.
O i latou o loo molia ua aofia ai se tamā ua 65 tausaga o le soifua o ia lea o Vincent Pesamino, o tamaitai o Sharlene Fidow ma Victoria kalapu ma le alii o Laki Junior.
O loo tetee uma i latou i moliaga a leoleo.
