O le Komesina o loo pulea le falepuipui i Tanumalala, o nisi o leoleo o lea falepuipui ma ni pagota o loo molimau i le suesuega o le maliu lilo o le susuga Kolani Jr Lam na maliu i le falepuipui a o tuli lona faasalaga soloatoa i le solitulafono o le fasioti tagata faamoemoeina.
O le suesuega na valaau i se vaiaso talu ai ae na toe tolopo se’i tālia le lipoti o le suesuega a le ofisa o le Komesina o Sulufaiga na faatonuina e le tamaitai faamasino o le pule o maliu poo le coroner, le afioga Alalatoa Rosella Papalii.
O le lipoti lea o loo faailoa ai ni lape i le faatinoga o le pitolaau a leoleo i le vaaia o pagota e galulue i faatoaga i fafo mai o le falepuipui.
O le molimau a se tasi o pagota o loo faamautu i le Potu 6 na ia ta’ua ai o ia ma isi o le latou potu e low risk i le tulaga i le amio.
O taimi e o ai i galuega e tele ina leai se leoleo e vaaia latou.
A avatu foi vailaau fanavao, e sui lava e latou ma faatino le galuega o le fanaina o le vao i se vaega o le fanua o le a faamamā mo se faatoaga.
O le toe aoina uma o meafaigaluega e aofia ai agaese ma vailaau o latou lava e toe faafoiina i le nofoaga e teu ai pe a uma a latou galuega.
O le a molimau le pule o le falepuipui le susuga Leiataua Afamasaga Samuelu ma nisi o leoleo o le toese pe a faaauau le suesuega o le maliu lilo i le Aso Tofi o lenei vaiaso.
