O lipoti lata mai mai leoleo ua faailoa ai o loo faia se suesuega i se faalavelave ua osofai ai e ni tagata se toatolu se fale i Sandringham, e aofia ai ma se tagata na alu atu ma se fana. 

O le satini suesue sinia o Scott Armstrong sa ia faailoa na valaau ane le latou fesoasoani i le tea o le ‘afa o le fitu i le afiafi ananafi i se fale i Taumata Rd.

E leai se tasi na faamanu’alia ae ua oese i latou na faatino lea solitulafono.

Fai mai leoleo o loo faia nei suesuega e faamautu ai lenei mataupu ma le mea tonu na tupu ae poo ai foi o loo aofia ai.

O le molimau a se tasi o tuaoi o le aiga lea e pei ona faamatala i le One News ua ta’ua ai pe 6 pe 7 taavale a leoleo na vaai iai i luma o le fale atoa ai ma taifau a leoleo ma leoleo faaaupegaina.

Na faamatala e lea molimau e pei ua lē toe tutusa lava le tulaga o iai le latou faaitu talu mai le maliu o Janak Patel, si tagata faigaluega lea na osofaia i fafo ane o le Rose Cottage Superette i le tausaga talu ai, ma e le mamao ese mai lo latou fale ma le nofoaga lea e tupu atu ai le faalavelave lea.

O loo faaauau suesuega a leoleo ma tālia sa latou lipoti.