E tumau pea le finagalo o le Ofisa Sili o le One NZ, le sponsor malosi a le NZ Warriors, le alii o Jason Paris i ana faamatalaga sa faia i le taimi ua sola sa ia tuuaia ai laufali o le NRL i le faa’au’au.

Na faatatau saunoaga a Paris i le taaloga na mavae atu nei a le NZ Warriors ma le Penrith Panthers na faia’ina ai le Warriors, tutuli ai i tua tama taaalo e toalua a le Warriors, fai mai tuuaiga a Paris o se faiga le talafeagai ma pitotasi.

O ia faamatalaga a le Ofisa Sili ua afua ai suesuega a le NRL ua faia i le taimi nei e ui e le o mautinoa pe iai se malosiaga o le totino lea latou te faasala ai se sponsor o le taaloga. 

Fai mai le Ofisa Sili o le NRL, Andrew Abdo i le lipoti a le RNZ o le a faia mea uma ia puipuia ai laufali o le taaloga faapea foi le taaloga, ma e le talia le fesiligia o le amiotonu o le faatinoina o le taaloga.

O nisi faamatalaga sa faia a le alii o Paris i se faatalanoaga na faia i le AM i le asō na ia ta’ua ai o lona manatu o ia o se tagata matamata i le taimi lea o le vevela o le taaloga ae o lona manatu o laufali e le o o ane e faimamago ae o loo agai ane e faia tulaga aupto sili i le latou galuega ma o loo tumau pea lona manatu e le o maua e le Warriors se tulaga talafeagai i vaiaso uma o ana taaloga.