Ua faia nei suesuega a le Commerce Commission i le kamupani a le HelloFresh ia ua lipotia ua silia ma le 100 faaseā ua oo atu i le komisi e faatatau i lea auaunaga.
Ua faailoa e le pule o le vaega o fefaataua’iga talafeagai i le Commerce Commission, Kirsten Mannix i se faatalanoaga ma le stuff.co.nz, i totonu o le 12 masina talu ai ua maua ai e le komisi le 104 o mataupu ua lāgā atu e uiga i le kamupani ma e aofia ai mataupu e faatatau i ni a latou faalauiloa, subscription, auaunaga i le va ma tagata aemaise le tau ma le ituaiga o taumafa faapea foi ma refunds a le au faatau.
Faailoa la e Mannix o le taimi nei o loo faatino le suesuega pe ua solia e le HelloFresh le tulafono o fefaataua’iga talafeagai.
O le tulafono lea e faasā ai faasalalauga taufaasese ma isi ituaiga gaioiga lē lelei e faia i tulaga faapisinisi.
O le faasalaga aupito tele pe afai e solia le Fair Trading Act e $200afe mo se tagata e toatasi ma le $600afe mo se pisinisi.
E lei manuia taumafaiga a talafou mo se faamatalaga mai le HelloFresh e tusa o lenei mataupu ae o le HelloFresh o le kamupani lea latou te saunia ma sapalaia meataumafa i tagata e lesitala i le latou auaunaga.
