O se ulugalii mai Amerika lea na felelei mai i Niu Sila nei ina ua mae’a le maliu o le la tama, ua falepuipui nei mo le tausaga atoa.

O Seth Johnson, 7 tausaga o le tamafai a le ulugalii o Timothy ma Sarah Johnson ma na maliu ia Mati 2015 i le fale o le aiga i Minnesota i Amerika.

Fai mai na maua atu lona tino i totonu o le fale i luga o se faamalu ae o ona matuafai ma nisi o le la fanau ua agai ese mai ma Amerika mo Niu Sila i le 2016 ae lei faia lea iai o moliaga o le tuulafoaia o le tamaititi.

Ua atoa le 7 tausaga o nonofo pea lea aiga i Niu Sila nei, aumau i Aukilani e pei ona lipotia e le Newstalk ZB ma faatoa toe foi i Amerika i le tausaga talu ai, na tutulai i le faamasinoga i le vaiaso nei ma tuuina ane ai le faaiuga a le faamasinoga e teena le talosaga a matua mo se faanofo vaavaaia ma tuuina loa iai le faasalaga e falepuipui mo le tausaga atoa.

Fai mai nisi lipoti ae lei uma le ola o le tamaititi o Seth, na faailoa e mātua o loo ma’i ae mumusu e vaai se togafitiga faafomai mo ia ma taumafai lava e togafiti e ala i le tuuina iai o vaitamini ma le honey i ona manuaga.

O suesuega ua iloa ai na uma lona ola ona o aafiaga mai le umi ona tuulafoaia aemaise o le laititi o si tamaititi i lea taimi.