O tuliga taavale a leoleo i le po anapo na iu ina soso’a ai e se isi taavale a leoleo se poumoli ma se fale faatali pasi ina ua taumafai e alofia le lavevea ai o tagata na savavali ane i lea vaega o le alatele.

Fai mai le leitio faavaomalo a Niu Sila poo le ‘afa o le 12 i le vaveao analeila na maitauina ai e leoleo se taavale e fealuai atu i le auala e aunoa ma sona numera lesitala ma ua iloa tele foi i le sola ese ma leoleo, na vaaia e latalata i Newmarket i le ogatotonu o le aai tele.

O le faamatalaga a leoleo na ta’ua ai na faailo atu e leoleo i le avetaavale e taofi le taavale peitai e lei tu ane ma fai ai loa tuliga.

Molimau leoleo o le taumafai e alofia le lavevea atu ai ma tagata savavali i le alatele na ala ai ona afaina ma le taavale e ui e lei iai se tasi na afaina.

O loo tau sailia pea le avetaavale o lea taavale.