O le taeao nei na faataunuu ai se sauniga faapitoa e faatautō ai ni sui e toatolu mo le faamasinoga o Fanua ma Suafa e ui na tuuina atu le tusi a le tamaitai Minisita e taofia ai le faataunuu o lea faamoemoe i nofoaga o le Matagaluega.
O i latou nei e aofia ai le tofi Sui Peresetene lea ua filifilia ai Faimalomatumua Mathew Lemisio, le tofi Peresetene Lagolago ua filifilia ai Leaupepe Fatu Pula ma le tofi Faamasino ua faatautoina ai tōfā Taueva Lelevaga Faafouina Mūpo.
Taua e le sui o le Radio Samoa o loo Apia ua faailoa e se tasi o molimau faatuatuaina e foliga mai ua lē fausia e le Peresetene le finagalo o le tamaitai Minisita ia Matamua Seumanu Vasati Sili Pulafana faapea foi lagolago a le Pulega o le Matagaluega e taatia ia tulaga ia sei taoto lelei mai tulafono ia e faatino ai le faagasologa (process) peitai o lea lava ia faatino.
I le tusi a le tamaitai Minisita na ia faatonu ai e leai se faatautoga e faataunuuina i nofoaga a le Matagaluega ma e le tatau ona iai se tasi o le aufaigaluega a le Matagaluega e auai i lea faamoemoe pe faaaoga foi meatotino a le Matagaluega e faataunuu ai lea faatautoga. Peitai o le taeao nei na vaaia ai le solia e lea vaega o le faamasinoga le poloa’i a le Minisita ae faataunuu pea le latou faatautoga i se tasi o potu faamasino.
I lea foi tusi na faamanino ai e le Minisita i le fautuaga a le Loia Sili e faapea o le faataunuu ai o se faatautoga o loo solia ai le tulafono e tulai mai ai masalosaloga ogaoga iai latou o loo auai i lea faatinoga e ui o loo silafia o loo soli le tulafono.
