Ua toe tasi nei le aso ona faamae’a lea o le tusigaigoa a le atunuu atoa, e pei ona faatulaga ai le Aso Lua, 7 Mati 2023, ma ua lipotia mai i le faitauga anapo ua silia nei ma le miliona le aofaiga o tagata taitoatasi ua mae’a ona faatumu a latou faamaumauga o le tusigaigoa. E faamae’a taeao ma amata faasalalau ai loa i aso taitasi se aofaiga atoa o faamaumauga mo Niu Sila.
I se saunoaga a le Deputy Government Statistician ma o le Deputy Chief Executive Census and Collection Operations, le susuga Simon Mason, na ia ta’ua ai le tulaga lelei o le maitauina ua toatele tagata ua faatumu mai a latou pepa o le tusigaigoa a o lei oo i le aso ua atofa e faamae’a ai.
O le tau faaiuiuga o le masina talu ai o Fepuari na amata ai ona toatele ua toe faafoi atu pepa ua faatumu o le tusigaigoa, ma ua matauina ai le naunau o le toatele ia vave ona faatumu a latou pepa a o lei oo i le aso faaiu.
Na faailoa mai foi i le faaiuga o le vaiaso talu ai, e pasia ai e le Kapeneta o se isi toe faaopoopoga o aso e faamae’a mai ai le faatumuina o pepa o le tusigaigoa mo i latou o loo alaala i nofoaga sa iloga ona aafia i le afā o Gabrielle ma lologa talu ai nei.
O le lelei o lenei tulaga e pei o na toatele ai ua aoina mai a latou pepa ua mae’a faatumu, ina ia lava ai le taimi e toa asia ai e le aufaigaluega aiga e mae’a ane le Aso o le Tusigaigoa e lei uma mai ona faatumu a latou pepa.
Pe a mavae taeao o le aso e faamae’a aloaia ai le tusigaigoa, ona amata lea e le Stats NZ ona faalauiloa mai i aso taitasi i luga o le latou upega tafailagi, le aofaiga atoa o i latou ua mae’a ona faatumu a latou faamaumauga, ma a o amata aoaoina mai pepa faatumu mai vaega eseese o Aoteaoa, o le a faapena foi ona faaopoopo i totonu o le aofaiga atoa.
