E 1 miliona le aofai atoa o fagu plastic sa fuafuaina e le asosi a le Samoa Recycle and Waste Management e aoina mai e fanau aoga o se vaega o le tauvaga.
O lenei tauvaga o le tausaga lona lua lenei ua faatinoina ai ma o le taeao analeila na asia ai e aoga tulagalua a Lefaga ma le Divine Mercy le nofoaga o loo faatinoina ai galuega a le asosi i le toe gaosia o se isi mea e faaaoga ai le fagu plastic.
Na saunoa le Peresitene a le Asosi, Marina Keil e tusa ai o lenei asiasiga, “Sa ave fanau e faamatamata i le nofoaga lea e lafoai ai le lapisi ona ave lea o i latou i le ofisa tutotonu a le asosi e faaali ai nisi o masini aemaise ai galuega o loo matou faatino pe a aumai ni lapisi e toe recycle.”
“Mai lava i otaota sei tulou i le faagaioiga mo le faatauina atu i fafo poo le toe faaaogaina foi e pei o ipu mata’eta’e e faia i le oneone e faaaogā e fai ai piliki, electronic waste ma le faiga o fagu plastic ma isi.
“E 500,000 le aofai o le container fagu plastics sa muamua ave i Ausetalia ia Iuni 2021, ae o le tauvaga o le tausaga nei lea e fuafua mo le masina fou e tau atoa ai le 1 miliona lea sa vaai mamao iai e ave i fafo.”
Na ta’ua e Keil o loo iai le lagona e faaauauina pea lenei auaunaga.
“E le gata o se tauvaga ae o loo telē foi se sao o lenei tauvaga i le a’oa’oina o fanau ma faalauiloa foi tulaga o le tumamā lautele e amata mai i fanauiti ina ia maua pea se siosiomaga mamā.
“Ou te faafetai ai i nei fanau i lo latou lagolagosua mai i galuega faatino a lenei asosi.
“A o faagasolo lenei tauvaga e vaaia ai lava matua o fanau nei oloo afisi atu se atigitaga poo se pusa oloo fueina ai dagu palstic nei ae le gata i lea o fanau ma a latou uilipaelo oloo faatu i tafaala ae ao le fagu plastic.”
O se sao tāua foi lea o mātua e ala i le lagolagoina o fanau ia latou taumafaiga aemaise o se aoaoga sili lea mo i latou i lo latou tuputupu a’e ia iloa ona tumamā i le siosiomaga.
E ui i nei polokalame uma ae iai lava nai faafitauli sa ta’ua e le Peresitene i le itu tau seleni.
“O le faafitauli lava o le tupe, e iai le lagona e le o lava fesoasoani a le malo e faatino ai galuega faagasolo a le asosi.
“E tele lo matou fia galulue i ni vaega tetele ae o le lave lea o le lē lava o le tala i le seleni, e oo ai lenei polokalame ina ia soo aoga aemaise pisinisi ia faalauiloa ai nei galuega.”
Ae ui i lea e le o mapu ai nisi o fesoasoani o loo tuuina mai i paaga a le asosi aemaise nisi o pisinisi.
