Ua silia ma le toa 600 tagata o loo aumau i Samoa nei, ua tuuina atu i ai le auaunaga faamamā toto talu ona faavaeina le auaunaga i le tausaga e 2005. 

E lē gata i lea ae o loo maitauina foi le siitia o gasegase faamamā toto fou i tausaga taitasi, ma sa ausia se maualuga e 66 gasegase fou i le tausaga faaletupe 2022 i le 2023.

Mai i faamaumauga a le Faalapotopotoga Faavae Tau Fatuga’o a Samoa, ua faamauina ai e lata i le 30% o tagata i totonu o Samoa ua aafia i gasegase tau fatuga’o. 

Mai ia lava faamaumauga, ua faamauina ai, e silia ma le 80% o tagata ua moomia le faamamā toto, e afua le leaga o fatuga’o ona o aafiaga o faamai lē pipisi, aemaise ai le gasegase o le suka ma le toto maualuga.

O le sini autu o le aso faavaomalo, “Fatuga’o Maloloina mo Tagata Uma – Avanoa Tutusa mo tagata uma i ia auaunaga mo le suesueina, togafitiga, ma le unaia malosi o le faaaogāina tatau o vailaau ma fualaau mo le tausia lelei o gasegase tau fatuga’o”.

Saunoa le Minisita o le Soifua Maloloina o Valasi Luapitofanua Toogamaga Selesele, i suesuega faalesoifua maloloina o loo faatino e le auaunaga ua faamautu ai le toatele o tagata ua aafia i gasegase o le suka ma le toto maualuga, e latou te lē o silafia o loo aafia ilatou i ia gasegase.

O le fautuaga a le Soifua Maloloina ia faatino vave loa le sailiga o ē ua aafia i nei gasegase ona e faigata tele isi gasegase e tupuga mai ai.

“Fai sau siaki faalesoifua maloloina”.

Saunoa Valasi o le vave ona silafia o le tulaga o lou soifua maloloina, o le vave foi lea ona e saili togafiti mo togafitiga e tatau ai.