Ua toe afea le faalapotopotoga o le Toomaga mo ē Puapuagatia i se isi lagolago a le malo o Iapani e ala i le fausia o se falea’oga fou mo le a’oa’oina o fanau sauāina o loo tausia i le nofoaga o le Campus of Hope i Tuanaimato.
O lea galuega fesoasoani ua mae’a faamautū i se sainigālima i le va o le Amepasa o Iapani i Samoa ma le Peresetene o le Toomaga.
Ua faamaonia i lea sainigālima le faatupe e lea malo o le falea’oga i le tau e $357,797 tālā.
O le tolu ai lea o fesoasoani a Iapani mo lea faalapotopotoga tuma’oti ua avea ma toomaga o tinā ma fanau e aafia i sauāga ma isi faafitauli ua lamatia ai lo latou saogalemū e lē gata o sauāga o le tino ma le mafaufau, ae o sauāga mai faiga faasolitulafono.
Ua lagona ai le si’ufofoga o le faafetai mai le Peresetene ma sui o le Toomaga i le agalelei pea o le malo o Iapani, ma ua faamatalaina e le faauluuluga o le faalapotopotoga lea lagolago o se faigāpa’aga ua faaauau pea le mafanafana ma le vāvālalata.
O le falea’oga fou e pei ona faailoa e le ofisa o le malo o Iapani i Apia, o le a iai potu a’oga, o se potu tusi ma le nofoaga mo faleui.
O le a faaopoopo lea falea’oga i le falea’oga na muamua fausia ma amata ai le a’oga mo fanau ua sauāina o loo i le vaaiga a lea faalapotopotoga.
Comments
Loading comments…