I faamaumauga a le faamasinoga e tusa ma le 25 moliaga o le faia o lafoga taufaaleaga o loo molia ai le tamaita’i o Perkin Feagiai Headle-Taufao, poo Salote Syrah Tautai.

O lea tamaita’i e nofo i Amerika, na tulai o ia i le Faamasinoga Maualalo ananafi i luma o le tamaitta’i faamasino ia Alalatoa Rosella Papalii, e tali i tuuaiga o loo tuuaia ai o ia e le Vaega Faaupufai o le Faatuatua i le Atua Samoa ua Tasi.

Na talosaga le itu a leoleo mo se lua vaiaso e tolo atu ai lenei mataupu sei faamautu mai moliaga a la latou itu. O lea talosaga sa te’ena e le alii loia o loo tulai mo Tautai ia Faimalomatumua Matthew Lemisio.

O le finauga a Lemisio e faapea ua lava ma totoe le taimi sa tatau ona faamautu ai moliaga a leoleo, ma faapea ai ua leva ona toe fia fo’i le tamaita’i o loo ia tula’i ai i Amerika.

O Tautai na saisai ma molia e leoleo i le masina ua tuanai i le moliaga o le Criminal Libel Law ina ua masalomia lona faia ai o ni lafoga e faaleagaina ai le tauleleia o nisi o sui o le Vaega Faaupufai o le FAST.

O loo molia lea tamaitai i lona faia o ni faamatalaga le moni i lalo o le vaega 117AA o le Tulafono o soligatulafono lea o loo manino mai ai le molia ai o se tagata na te faia ni faamatalaga le moni i se isi tagata ma faasalalau i soo se auala o faamatalaga lava, ma le faamoemoe e faaleagaina ai le tulaga tauleleia o sea tagata e sese lea tulaga ma e molia i lea Tulafono. 

O loo faapea mai foi se fuaiupu i lalo lava o lea Tulafono, e mafai ona tetee atu pe afai o faamatalaga na faasalalauina i le isi tagata e moni ma faamaoni.

O loo tatala i tua le tamaitai o Perkin Tautai, ae ua toe tolopo mo le 2vaiaso le mataupu seia faamautu moliaga a leoleo.