E silia i le 200 i latou ua mae’a aoaoga ma faauu mai ma tusipasi mai le APTC.

Sa molimauina e le toatele o aiga uo ma ē masani aemaise o le Matagaluega o Aoga Taaloga ma Aganuu e pei ona fai ai le Alii Minisita ia Seuula Ioane ma lauga aami na te momoli le faafetai a Samoa i le malo o Ausetalia ona o le galuega lelei a le APTC, ae se’i faamalo atu i le ‘au saili o lea ua tali le seleselega sa tautiga ai le fia o aso, masina, ma tausaga aemaise ai foi o le tapuaiga lē leoa a aiga, nuu ma ekalesia, o lea ua taulau le faamoemoe.

E aofia ai i ē na faauu o le aufaigaluega mai nisi Matagaluega a le Malo ma faalapotopotoga e pei o le Matagaluega o Leoleo, o le Pulega o Tagata Tafafao Maimoa mai Samoa, Ofisa o Faailoga Taualoa o Samoa, Pisinisi Alamanuia ma Leipa o le Komisi o Tagata Faigaluega a le Malo, Matagaluega o Faatoaga ma Faigafaiva, Pulega o le Suavai, o le Malosi Faaeletise, ma le Puna’oa Faalenatura ma le Siosiomaga.

Ae o le auga o aute o lea aso tāua i le soifuaga aoaoina o le molimauina lea o le lata i le 100 tamaitai ua faamanuiaina a latou polokalame sa aoaoina e pei o le toafitu o i latou ia ua faauuina le faakamuta ma le palama.

Ua lata i le 20,000 e ua aoaoina ma faamanuia mai i le itulagi lenei i aoaoga mai le APTC, mai lena numera e silia i le 2,000 tagata Samoa, ae o le silia i le 40% o tamaitai ua maua tomai mai matata eseese.

O loo tulituli matagau e le Faigamalo le faisao atu i le atinae o tagata soifua, e faaleleia ma faatupu atili ai le auaunaga mo soo se Samoa.