O lea ua toe foi mai le Palemia o le atunuu mai Papua Niu Kini ae ua lipotia o loo fia talanoa i tulaga tau fefaataua’iga ma le Palemia o Initia o Narendra Modi pe a asiasi mai i le atunuu.

A o iai Hipkins i Papua sa feiloai ai ma taitai o le Pasefika ma ona tuaoi faapea foi ma le failautusi o Amerika ma sa ia ta’ua i lana faatalanoaga i luga o le Morning Report o le a lē gafatia lona oo atu i Initia a o lei faia le palota ae o le a asia e le minisita o fefaataua’iga o Damien O’Connor a o lei oo mai le palota.

Na ta’ua e le Palemia e manatu o loo iai avanoa mo Niu Sila e faaauau ai ona faalautele ona sootaga tau fefaataua’iga.

Na ia faailoa foi o isi atunuu ua mae’a ona faamautu maliega tau fefaataua’iga ma Initia.

O le vaiaso nei ua sainia ai se maliega i le va o Amerika ma Papua o le a mafai ai e vaegaau a Amerika ona afea ogasami ma le ea i lea atunuu ma ua ta’ua e Hipkins a oo loa i tulaga o polokiki i le Pasefika e ao ona silafia o atunuu ia e fai lava e latou a latou faaiuga aemaise lava i mataupu faavaomalo e mananao ai.

O le tausaga na tea nei na saini ai foi le maliega a le Atu Solomona ma Saina lea sa faaalia atu foi iai finagalo o Amerika, Ausetalia ma Niu SIla.

Ae na faailoa foi e le Palemia e faaauau pea fefaataua’iga a Niu Sila ma Saina ma e leai se mafuaaga e taofia ai fua lea tulaga.