Ua silasila nei le pulega o le matagaluega o leoleo, falepuipui ma le toe fuataina, i le ono faia o ni suega poo test, e saili ai leoleo o faaaogāina nakoti poo laau ma pauta faasāina e pei o le ‘aisa.

Ua faailoa lea tulaga e le sui Komesina o le matagaluega le susuga Papalii Monalisa Tia’i Keti, i sona finagalo i le vaega faasalalau o le Talamua, ina ua mae’a faailoa le faia o se faaiuga e faamaloloto le tumau ni Malu o le Malo e aofia ai ni alii se toatolu ma se tamaitai e toatasi, ona o masalomiaga i lo latou aafia i le faaaogāina o nakoti.

O le tausaga e 2022 e toa 22 leoleo na masalomia foi i lea lava tulaga lea na faamavae ai nisi a o lei faia le suesuega a o nisi na molia.

Ua faaalia e le sui komesina i lea auaunaga faasalalau, e lē ‘alo lava le matagaluega i le faia o le faaiuga talafeagai i soo se leoleo e laumanuia i le faaaogā o nakoti poo le aafia ini gaioiga faasolitulafono e fesootai ma fualaau o pauta ma laau faasāina.

Faaalia foi e le sui komesina e lē fou tuuaiga o le aafia o nisi o leoleo i ia gaioiga solitulafono.