Ua lipotia e le RNZ Pacific le amata silasila o le malo o Samoa i nisi auala e fesoasoani ai i le faatuputeleina pea o le aofai o gasegase o loo manaomia togafitiga i atunuu i fafo mai o Samoa.

Na lipotia e le nusipepa o le Samoa Observer se faamatalaga a le Palemia e faapea, ua feagai nei le matagaluega o le soifua maloloina ma le faia o se fua e mafai ai ona maua e nisi tagata faaopoopo togafitiga i lalo o le overseas medical scheme funding.

Na ta’ua i le lipoti sa pasia e le malo se isi 4 miliona tala faaopoopo mo le fuafuaga lea i le masina o Mati o le tausaga nei, e faaopopo atu i le 8 miliona sa faaaofia i le tala faatatau o le tupe 2021-2022. 

Ua faailoa ai foi ma se isi avanoa e le Palemia i se maliega ma se ofisa fomai i Fiti e mafai ona latou siakiina ma faia taotoga mo gasegase i Fiti ma o loo iai le faamoemoe e mafai ona faatino lea tulaga i Samoa.

Na faailoa e le Palemia i lea lipoti o le maota gasegase o Tupua Tamasese Meaole e tatau ona mafai ona faatotoga lelei i meafaigaluega e manaomia ina ia mafai ai ona faatino lea auaunaga i le atunuu ina ia toatele ai gasegase e mafai ona togafitia ai. 

Sa ia ta’ua foi le ono maua atu o se fesoasoani mai le Samoa Medical Association of NZ.

O Samoa le isi atunuu o loo maualuga ai le aofai o tagata e aafia i gasegase le pipisi.