O fuafuaga a le Malo i le poloketi tasi le miliona tala mo itumalo faapalota e 51, ua faamautu ai nei le siitia o vaegatupe mo le faagaioia o ofisa o Fono Faavae ma totogi ai tagata faigaluega o loo faagaioia ia ofisa.

Talu ai nei i se saunoaga faalauaitele mai le Sui Palemia na faailoa ai e le afioga Tuala Tevaga Iosefo Ponifasio, le siitia mai le 150 afe i le 160 afe tala mo ofisa o Fono Faavae ma totogi o tagata faigaluega.

O ia ofisa ma le aufaigaluega e pei ona faailoa e le Sui Palemia i lea saunoaga faalauaitele, o loo faalagolago iai le unaia o galuega fuafua a itumalo, ma e faapea foi i le faatinoina o galuega ma le tuliloaina ma mataitu le faatinoga uma o polokalame a itumalo taitasi ina ia ausia manulauti ma matati’a ua faataoto e le Malo.

O le agaga o le Malo ia mapo le faatinoina o lea faamoemoe ma ia laugatasia atoa ai itumalo.

Mo le silafia o lea ua faailoa e le Minisita o le Matagaluega o Tina ma Tamaitai Atinae o Afioaga ma Aga Fesootai o loo vaaia le poloketi tasi le miliona tala, le toe iloilo e le komiti galue poo le steering committee o taiala o le poloketi, e mafua ona e eseese manaoga o itumalo i atinae e faasoa iai a latou tai miliona tala.

E iai le talitonuga o le a faailoa e le komiti galue ni suiga o ia taiala pe a toe amatalia galuega o le tausaga fou.