O faamaumauga mai le ofisa o numera faamaumauina a le tatou Malo ua faailoa ai le siitia maualuga pea o tagata e malaga mai i lo tatou atunuu e pei ona faamauina le silia i le 40 afe o ē na malaga mai i le tolu masina muamua o lenei tausaga.
O faamaumauga nei o loo faailoa i le lipoti o le masina o Me lea e pito maualuga ai lava le aofai o tagata na malaga mai Niu Sila e 13,886 poo le 46 tesimale 1 pasene.
O loo lona lua tagata malaga mai Ausetalia e 7,025 poo le 23 tesimale 3 pasene, ma Amerika e 2,398 ma Amerika Samoa e 2,225.
I le silia i le 40 afe lea o tagata na malaga mai i le kuata muamua o lenei tausaga poo le 3 masina na amata faitau mai le amataga o Ianuari e oo mai i le faaiuga o Aperila 2023, o le itupa o alii e pito toatele i tagata e malaga mai e 14,445 ae o tamaitai e 14,396.
O le toatele sa agai ma nonofo i fale nofo totogi ma fale o aiga, a o le isi vaega sa nonofo i faletalimalo ma faleapitaga mo tagata tafafao.
