O faamai lē pipisi poo non communicable diseases poo NCD’s ua molimauina le faatupulaia ai o le faitau aofai o tagata i Samoa ua aafia ai.
O faamai ia e pei o le suka, ma’i fatu, toto maualuga, ma fatuga’o ua aafia. O taumafaiga a le malo mai tausaga ua tuanai e oo mai i le taimi nei, o le faatino lea o auala e faaitiitia ai ia gasegase, ma faaitiitia ai tupe alu mo le togafitiga o gasegase lē pipisi.
O le tasi o taumafaiga o le sii lea o le tau o taumafa e tele lo latou sao i le faatupuina o ia gasegase e pei ona mafua ai ni teuteuga o le tulafono o tiute ma lafoga i luga o le tau o taumafa ga’oa ma lololo, faapea taumafa suamalie, o taumafa e itiiti le ga’o e maua ai faapea le faapa’ū o le tiute ma lafoga i tau o fualaau’aina taumafa mata lea e amata faamamalu i le masina amata o lenei tausaga fou.
O teuteuga ia na pasia i le Palemene i se tulaga faanatinati i le masina faaiu o le tausaga na tea nei lea o le sii ai tiute o taumafa tau aano o manufasi e pei o mamoe ga’oa, ae faaitiitia le tiute o taumafa aano o manufasi e pei o ua mamoe, ma le vae mamoe le lamb shanks.
O le tapuvae puaa o loo taugofie i le taimi nei o le a sii le tiute e faaulufale mai ai, lea o le a 15 pasene le totogi o le tiute faatusa i le 8 pasene o loo iai nei, faaopoopo iai ma le 5 pasene o le lafoga o le Excise tax ona 20 pasene lea o le siitaga fou.
Ua lipotia se finagalo o le taitai o le Itu agai ua fautua ai i le Malo sa tatau ona faatalanoa ma le atunuu lautele le teuteuga mo se finagalo o tagata a o lei faia le siitaga fou.
Peitai ua faaalia e le sui Palemia o le Minisita o Tiute ma Tupe maua ina ua faamalamalama le teuteuga i le Palemene ia Tesema, o se tasi lea o fuafuaga a le faigamalo sa iai o le siitia o tiute ma lafoga i luga o ia taumafa, ae na faatuai ona faatino i lena taimi ona o aafiaga o Samoa ma le lalolagi i puipuiga o le faamai Koviti-19.
