Ua toe sau foi tala o le sii i luga o tau o pasese o vaa o loo feoa’i ai tagata Waiheke. O Iuni lea na sii ai e le kamupani a le Fullers tau o pasese o a latou vaa, a o ananafi le ulua’i aso o Aokuso ua alu ai i luga tau o pasese o vaa a le SeaLink Vehicle Ferry.
O le Fullers ma le SeaLink o loo feoa’i i le va o le taulaga i Aukilani ma Waiheke. I le siitaga la a le SeaLink na amata ananafi, ua alu i luga i le 8%, e tusa lea ua $446.50 i le masina mo le tagata matua, ua suia ai mai le $413.
O vaa nei a le Fullers ma le SeaLink e lē o mafai ona la faaaogāina le faamāmā avega o loo aumai e le malo ona e le’i mae’a lava galuega o loo taumafai ai e aumai i lalo o le system a le Auckland Transport.
Ae i se tala lata mai i nei feutana’iga, o loo tālia pea ma ua iai lipoti e tatau ona oo atu ia Oketopa ua lava faiga faatekonolosi e suia mai ai i lalo o pulega a le Auckland Transport, ae sili ai o le mau avanoa o pasese e faaaogāina nei vaa i le pa’ū o pasese o loo iai ona o le fesoasoani a le malo.
