I le tumutumu ai o le malaetaalo o Perenise Eteuati i Iva i Savaii i le Aso Faraile ma le Aso Toonai na tea nei, i le taamilosaga lakapi fitu a le Vodafone ma le Pulega o le Lakapi Samoa, o se taamilosaga tulaga ese ona sa tala malae i le sailiga o le siamupini i le va o le ‘au malosi o le Tamauli ma Vaiala le taaloga a le vaega o tama matu i le lakapi poo le Golden Oldies a le afioaga o Iva ma le ‘au o le Samoa Golden Oldies.
O le taualuga o le taamilosaga na manumalo ai le ‘au a le BBE Vaiala i le sailiga siamupini i le Ipu a le susuga i le faafeagaiga Reverend Elder Apelu Lelevaga Cup ae malolo le ‘au a le OTT Constructors Tamauli mai Salelologa i Savaii. O ‘ai o le taaloga e 19 i le 17.
O le susuga i le faifeau EFKS a le afioaga o Iva susuga Tonu Mauafu ma lana Autalavou faapea le kalapu lakapi o le Iva White Lions sa talimalo i le masii atu o ‘au mai Upolu mo le taamilosaga lona 14 o le taaloga lakapi taitoafitu e lagolagoina e le kamupani o le Vodafone.
