Ua mautu nei le sao atu o le aukilikiti a tamaitai Samoa i le matutua e i lalo o le 19 tausaga poo le Under 19, i le sailiga o le siamupini o le Ipu o le lalolagi i le kilikiti faapeletania e faia i Meleisia ia Ianuari o le tausaga fou, ina ua siamupini i le taamilosaga a tamaitai na faia i le atunuu o Indonesia.
Na manumalo le ‘au Samoa i le ‘au a Fiti ma ua faaalia e le faalapotopotoga o le taaloga kilikiti faapeletania a Samoa o se taimi muamua lenei ua ausia ai e se ‘au masii a le atunuu i lea taaloga faavaomalo se tulaga maualuga.
O le taamilosaga saili avanoa poo le qualifying tournament sa faia i Indonesia na suipi ai le ‘au a tamaitai Samoa i le vaega o le Under 19 i le siamupini ma sao ai i le Ipu o le lalolagi i le tausaga fou.
