E sese faamatalaga na tuuina atu i le Palemia, ma o lea ua toe faatoese ai le komesina o leoleo.
O le aso ananafi na toe faamanino mai ai ma faatoese Andrew Coster agai i le Palemia Chris Hipkins i le sese o faamatalaga e faatatau i tagata galulue i luga o le auala lea na faasiilima e nisi i Hawkes Bay e faaaoga ai laau malosi.
O ni faamatalaga na saunoa mai ai ma le Palemia i le faatoa aliae o lenei mataupu ma ia teena e iai se mea faapea na tupu, ma na ia saunoa manino o le tala mai lea mai le ofisa o leoleo.
O lea foi ua faatoese le Palemia i le atunuu ona o le sese o faamatalaga na ia toe faasoaina mai.
E ui e le o le komesina ia Coster lea na pasia faamatalaga nei agai i le Palemia, peitai ona o ia o le faaulu ma o lana aufaigaluega, o lea ua ia toe tautino ai o lona sese.
O se mataupu na fai ai lava si nunumi ona e ui ina fai mai le Palemia e leai se mea faapea o tupu, peitai o se faamatalaga mai le ofisa o leoleo i le Eastern District o lea sa faanofofilemu e leoleo o lea itumalo ma o faamatalaga uma nei na tuuina atu i le ofisa tutotonu o leoleo poo le Police National Headquarters.
E le o se taimi faigofie foi lea na fesea’i ai faamatalaga e le gata i le Palemia, ae o le ofisa o leoleo ona o le mafatia tele o le Eastern District i le afā o Gabrielle.
