O le atunu’u tuaoi o Tonga o le meleni o se tasi o la’au tau fa’atoaga o loo sasa’a atu ai tupe i lona tamao’aiga e ala i le fa’atau atu i maketi i isi atunu’u. O lo’o iai le talitonuga e mafai foi ona maua e Samoa le alagātupe pe a atina’e lelei lea la’au tau faato’aga. O le polokalame fesoasoani mo fa’atoaga i Samoa o lo’o fesoasoani mai iai le malo o Saina, ua taunu’u manuia se tasi o ana taumafaiga i le fa’afaileleina ma totō le meleni e fa’aaoga iai auala ma metotita ua fua mai ai meleni e fetaui lelei ma le tau vevela o le tatou atunu’u.

E lua itu’aiga o meleni ua fa’ailoa lautele nei e lea polokalame le ola lelei ma maua ai fua lapopo’a ma suamalie o lea la’au tau faato’aga, e seāseā ona atina’eina e le aufa’i fa’atoaga.

O se tasi o auala ua fa’ailoa ua mafai ai ona ola lelei le meleni, o le toto ia ola ma fa’asosolo i totonu o falela’au poo greenhouses.

Ua una’ia ai le au faifa’atoaga i Samoa e sa’ili atu i lea polokalame o loo iai lona nofoaga i Nu’u, fa’amatalaga i auala e mafai ai ona atina’e le meleni. O ata o le seleselega muamua mai lea taumafaiga o loo molimauina ai le manuia o ia taumafaiga ma le faamoemoe, ia fa’alautele atu i le au faifa’atoaga auala e atina’e ma va’aia lelei ai le meleni ina ia manuia ma maua ai tupe a le au faifa’atoaga, ma le tasi o itu o meleni suamalie ma tofo lelei ile taumafa.