E 10 tino maliliu o loo taooto i le falemaliu a le Maota Gasegase i Motootua, o mataupu na poloaia e le faamasino o le faamasinoga o maliu lilo le faia o ni taotoga faapitoa ina ia faamautu ai mafuaaga na maliliu ai.
O isi tino maliliu o mataupu na tulai mai i ni soligatulafono.
Faamaonia mai e le sui komesina o leoleo, Papalii Monalisa Tia’i-Keti, o le Aso Sa nei e taunuu mai ai le fomai faapitoa e faatino taotoga.
Ta’ua e Papalii ina ua talosagaina e le matagaluega le fomai faapitoa, e na o le 7 tino maliliu o loo iai, peitai o lea ua siitia le fuainumera.
O ia tino maliliu e mai i le masina o Tesema o le tausaga ua mavae.
O se tasi lea o manaoga a le malo o Samoa ina ia iai se fomai faapitoa e na te faatinoina taotoga faapitoa.
E silia ma le $40,000 tala le seleni e faaalu e le malo e totogi ai lea auaunaga aemaise o le malaga mai i Fiti o le fomai faapitoa.
